Ikipe ya Polisi y’u Rwanda y’umukino w’intoki wa Volleyball (Police VC), kuri iki Cyumweru tariki ya 11 Kamena, yegukanye igikombe cy’irushanwa rya 19 ryo kwibuka Rutsindura (Rutsindura Memorial Tournament) idatsinzwe umukino n’umwe.
Ni nyuma yo gutsinda amaseti 3-0, ikipe ya Gisagara VC yari ifite iki gikombe yatwaye umwaka ushize, ku mukino wa nyuma wabereye ku kibuga cya Petit Séminaire Virgo Fidelis de Karubanda mu Karere ka Huye.
Ni irushanwa, ryatangiye ku wa Gatandatu tariki 10 Kamena, ryitabirwa n’amakipe 7 ari yo; Police VC, APR VC, REG VC, Gisagara VC, UR Nyarugenge, UR CAVM na Rukinzo VC yo mu gihugu cy’u Burundi.
Mu mukino wari wahuje aya makipe yombi mu ijonjora, nabwo Police VC ikaba yari yatsinze Gisagara VC ku maseti 3-1, Police VC iza kugera ku mukino wa nyuma itsinze APR VC amaseti 3-0, ku manota 25-20, 25-17 na 25-21.
Umukino wa nyuma watangiye ushyushye, urangwa no guhangana ku mpande zombi, ariko Police VC ikaza kujya inyuzamo igashyiramo ikinyuranyo cy’amanota, iseti ya mbere yaje kurangira ku manota 25-20 ya Gisagara, iseti ya kabiri Police VC iyitsinda ku manota 25-21, mu gihe iseti ya gatatu yaje kurangira ku manota 25-20, Police VC yegukana igikombe ityo.
Umutoza w’ikipe ya Police VC, Dr. Mbanza Sylvestre yavuze ko gutwara iki gikombe babikesha gushyira mu bikorwa imyitozo bakoze no gukorera hamwe nk’ikipe.
Yagize ati: “Biradushimishije kuba tubashije gutwara iki gikombe tudatsinzwe umukino n’umwe, ibanga twakoresheje ni ugushyira mu bikorwa imyitozo twakoze, dushyira imbaraga muri serivisi na defense, kandi bikaba byabashije gutanga umusaruro twifuzaga.”
Yongeyeho ko kwegukana iri rushanwa bibongereye imbaraga n’icyizere kandi ko intego ari iyo gukomeza kwegukana ibikombe.
Ati:”Kuri ubu turi ku mwanya wa gatatu muri Shampiyona y’igihugu y’umukino wa Volleyball, hari n’irushanwa ryo Kwibuka Jenoside twitegura mu mpera z’uku kwezi, intego dufite ni iyo kwitwara neza mu marushanwa yose tuzitabira, tukegukana ibikombe.”
Yashimiye ubuyobozi bwa Polisi uburyo bubashyigikira, asaba abafana gukomeza kuba inyuma y’ikipe abizeza gutwara ibikombe no gukomeza kugira uruhare mu guteza imbere umukino wa Volley ball mu gihugu.
Rutsindura Memorial Tournament, ni irushanwa ngarukamwaka ritegurwa hagamijwe kwibuka Rutsindura Alphonse wabaye, umusifuzi, aba n’umutoza w’amakipe atandukanye ya Volleyball arimo n’ikipe y’Igihugu y’abagore, aza kuba na Visi Perezida wa Federasiyo ya Volleyball (FRVB) mbere y’uko yicwa muri Jenoside yakorewe Abatutsi mu 1994.
